الفرق بين حوار ع الفايسبوك وبين قراءة كتاب

1- الحوار :
ساعات واحد يلقى روحو مضطر إضطرار شديد بش يدخل في حوار بما أنو شاف ++بهامة .. مراحل متقدمة من البهامة وفقه النكد .. دونك تدخل وتعطي رأيك في الحوار بكل احترام ومودة وحب والكلام هذاكا الكل .. وبرشا مرات، خاصة إذا كان النقاش سخون، تضطر زادة أنك تحط في آآآخر التعليق "بجاه ربي مايسبني حتى واحد" .. بالطبع على خاطر صار السب والشتم وقلة الحياء ميزة يتميز بها المجتمع التونسي .. وأول جواب يتحطلك تلقاه مخالف لرغبتك كله سب وشتم وتطييح قدر خاصة خاصة إذا كان جوابك في بلاصتو ! وإللي تحاور فيه ما لقى ما يقول !! كن متأكد إللي جوابه وقتها بش يكون على شاكلة "شكونك انتي بش نتعلم منك"، "كلامك غالط" (ويسكت ههه)، "بلا بلا بلا بلا بلا موووووووو" (يزيد يدخلها في حيط أكثر، وكل ما تزيد تحكي معاه تتأكد إللي انتي قادم على مشروع بناء إنسان !) .. اما الأحلى من الحوارات هاذي .. حوارات أخرى ملخص الموضوع متاعها .. ماتفهم شيء .. تلقاه مثلا 100 تعليق تقول أول ما تقرا "والله ظاهر فيه حوار طيارة بش نقراه لعل نتعلم حاجة ونشارك معاهم" .. تقرا تقرا تقرا تقرا .. تكمل التعليقات الكل .. تقول "يلــــــــــــــــــــــعن ********** ويني الاشكالية اللي طارحينها هالمفرخ ؟؟؟؟؟؟؟؟؟؟؟؟؟" .. المهم إذا تضربت ع راسك وغلطت وحبيت تشارك في حوار ننصحك إلبس كاسك وشهد الشهادتين وادخل وحاول شد روحك ماتسبش ! إذا فديت وحبيت تخرج من الحوار راهو كلام كيما "الاختلاف لا يفسد للود قضية وووو" ما ياكلش معاهم .. إما أنك تقتنع بكلامو وإلا تكمل الحوار .. نقصد تكمل تشيخ سبان .. الحل سيدي أنك تقلو ماااينة اقتنعت وانتي صحيح وانا غالط واخرج من الحوار وماعادش تغلط مرة أخرى وتناقشهم ..

حاصيلو عدد النقاشات اللي تستفيد منهم يتحسبو ع صوابع اليدين .. البقية الشكارة والبحر

2- الكتاب :
لهنا العز .. تشد كتاب .. تقرا وانتي رايض ما يقلقك حتى واحد حتى لو كان تقرا في حاجات معارضة لفكرك هاك تقرا والمفيد لا انتي بش تحكي مع الكاتب ولا الكاتب بش يقلك اقتنع بسيف وزيد 99% بش تخرج وانتي حصلت إفادة حتى كانك تقرا في كتاب معارض لفكرك ع الاقل بش "تناقش" روحك وتبني أفكارك وتنسق الأجوبة متاعك ع كلامو ..

ملاحظة : الحقيقة كي كتبت عنوان "الفرق بين وبين .. حسيت روحي نكتب في عنوان ماعندو حتى معنى .. المقارنة تجي بين حاجتين عندهم حد أدنى من المشابهة ع الاقل .. أما قلت بعد نتصور الحد الأدنى من المشابهة بيناتهم هو "النية" .. أنك ناوي تستفيد وتسخايل روحك بش تعمل حاجة تصلح من الأول بكل .. اكيد كي تقرا كتاب وتكملو تستفيد واللي متأكد منو أكثر أنك بش تكره روحك بعد كا تكمل الحوار.

دمتم بعاد ع حوارات الفايسبوك