انتي تونسي ؟ وتحب تشارك في بناء بلادك ؟
لقيت برشا أحزاب ودخلوك بعضك ؟ مش مشكلة .. شوف برامجهم ..
واللي اقنعك منهم انظملو وشارك فيه واخدم تحت سقف الحزب اللي اقنعك واللي تعرف صدقو ..
انتي اطلعت ع برنامج النهضة وفكرها ؟ واقنعتك الحركة هاذي ؟ انظملها ومن غير لا تسب وتشتم غيرك ..
انتي اطلعت ع برنامج المؤتمر وعجبك الحزب هذا واقنعك ؟ انظم للحزب هذا واخدم معاهم من غير لا تسب غيرك وتشتمهم ..
انتي اطلعت على برنامج حزب العمال واقنعك وعجبك ؟ انظم لحزب العمال من غير لا تسب وتشتم غيرك ... إلخ
ماعجبك حتى حزب وطيروهالك الكل ؟ وانتي نهار كامل توصف فاهم بالكذابة والغشاشة والمنافقين اللي يسعاو للكرسي ووو ؟ مش مشكلة ادخل للمجلس التأسيسي بقائمة مستقلة والا كوّن حزب واعطاهم "المثال" متاع الصادق اللي يخدم في بلادو .. (اتو تلقى برشا عباد يقولولك انتي كذاب ومنافق وتجري ع الكرسي ووو وقتها اتو تعرف قداش كنت تافه كي تتهم غيرك هكاكا .. الكلام هذا بش يقعد محفور في عقلية التونسي)
انتي تونسي وفددوك المظاهرات متاع العباد اللي يطالبو بحقوقهم ؟ خلاهم يتظاهرو وماتشاركش ..
انتي تونسي وتحب تدافع ع حقوق الانسان من غير لا تدخل في لعبة متاع احزاب .. شارك في منظمات حقوقية ونقابات ..
انتي تونسي وتحب تعمل الخير لاولاد بلادك وتبعد ع تكسير الراس متاع السياسة والأمور هاذيكا ؟ شارك في جمعية وانفع اولاد بلادك ..
انتي تونسي ؟ نقص من الكلام واخدم وانفع بلادك ..
انتي تونسي ؟ ماتغزرش لغيرك وتعيبهم إنما كون انتي المثال الصادق واعطاهم المثل ..
Aucun commentaire:
Enregistrer un commentaire
Remarque : Seul un membre de ce blog est autorisé à enregistrer un commentaire.