samedi 14 mai 2011

السلفيــــــّــــــــين


الموضوع هذا لازمو مجلدات الحقيقة  ومانكملوهوش 
السلفيّة واتباع السلف والعض على منهج السلف بالنواجذ وإلتزام ما كان عليه الصحابة 
كلام أول ماتسمعو يعجبك والحقيقة يقولو أي مسلم في الدنيا 
شكون مايحبش السلف وإلا الصحابة وإلا شكون مايقراش التاريخ الإسلامي في أحسن الفترات متاعو ويقعد باهت كيفاش الصحابة وصلو فتحو الدنيا الكل في أعوام ! بالطبيعة ثما حكاية وثما سر وكي تقرا التاريخ متاعهم شنو تلقى ؟ تلقاهم ملتزمين بالأخلاق وملتزمين بصفات الرسول (ص) وتلقاهم كيما قال  ربي يؤثرون على أنفسهم ولو كان بهم خصاصة ... إلخ
أما توّا ! ههه
السلفيين ولاّو مايقبلوش أي حاجة من عند الغرب "الكافر الجاهل" السلفية ولاّت تتلخص في حاجتين :
كي تعطاهم مشكلة مايجاوبوش وكي تعطاهم حل يرفضوه
علاش على خاطر ماوردش عند السلف الموضوع هذا !! الحل الوحيد نقعدو نستنّاو حتى لين نموتو بش نقابلو السلف ونسألوهم ! هايل ياسر !!
كانك سلفي (عندي مشكلة مع السلفية العلمية أكثر من الجهادية) وتقرا قي المقال هاو بش نعطيك مشكلة صغيرة ياسر واقعد خمم كيفاش تحلها، وبالطبيعة ماكش انتي بش تخمم أما بش تعطي للشيخ غوغل يلوّج في موقع :
1- الشيخ ابن باز
2- الشيخ العثيميين
3- الشيخ الألباني
...
وتلوّج في مواقعهم
باهي برّا فركس :
المظاهرات لا تجوز ؟ بالطبيعة لا تجوز على حسابكم .. باهي إذا كان السيد يقول الشرع مايصلحش لزماننا ويسب في الدين من أولو لآخرو (ويقول انا مسلم في نفس الوقت ! كثرو هالايامات الأشكال هاذي !!) يجوز وإلا لا ؟! لا يجوز بطبيعة الحال !! باهي كان تماداى ونحّى الحجاب لبناتنا وعذب أولادنا وحبسهم وتبعنا حتى في الجوامع ؟! شيء ؟! باقي لا يجوز .. باهي كان هو عذّب الشعب وقطعو مسكين وقطع عليه الخبزة ؟! باقي لا يجوز ؟!! الشعب سايي بش يموت يستغيث والرئيس بش يبيع تراب البلاد لأمريكا ؟!! بالله العظيم ولا شفت عباد تخمم كيفكم .. بالكش تقول انا نتقوّل علاهم ؟! يا صديقي هذا إللي حكيتو مع برشا من عباد ع الفايسبوك وإلا في الوقع بالله العظيم راني نقعد باهت ونتذكر مقولة "من المعضلات توضيح الواضحات" !!
السيد تقلو هاو الشمس .. يقلّك لا ماهاش شمس !! يا إنسان والله شمس !! يقلك مهأه .. وقتها انا نفد ونقلو برّا زمّر بففففف ها ولدي قلت لواحد منهم انا من الخوارج قالي اي علاش ع خاطر خرجت مظاهرات قتلو باهي يا خويا مشات معاك ومعاوية بن سفيان من الخوارج ؟؟ هههه بطبيعة الحال دخل في حيط وقتها !
باهي نجيو توا للسلفية الجهادية .. تقلهم بش نسئلكم .. انتم عندكم حلول عمليّة للأمة ؟! يقولولك اي بطبيعة الحال عندنا مالا شنوة ؟! الله أكبر !! .. باهي شنوة الحلول هاذي ؟..ديراكت يقلّك إعلان الجهاد على الكيان الصهيوني الغاشم والولاء والبراء من أمريكا وكل عبدة الطاغوت !! .. ها ها ها بشوية !! شنوة؟؟!! .. بعد يصرصتلك صيفت كعيبة موضوع ع اتباع الهوى واتباع النفس والفتنة حتّى لين تشك في روحك !! تغزر منهنا ومنهنا وتقلّو ياخي تقصد فيا انا ؟؟ يقلك مجرد تذكير على خاطر الذكرى تنفع المؤمنين .. اممم... باهي لا علينا كيما طالبان يعني كي لمّت حق طيارة مانعرفش منين منهنا ومنهنا وبدات تتجلطم على أمريكا وعلى إسرائيل وعقدتها مع دول الغرب وزادت شوية وكسرت تمثال بوذى ياخي هلكتها مع دول الشرق ؟! كيما هكاكا ؟؟ دولة ماعندهاش كيّاس وماعندهاش كيران عملت تبرعات لحق طيارة وهدّت على أمريكا هذاكا الجهاد ؟! .. يقلك ديراكت هذاكا هو الجهاد ويقعد يحكيلك ع "عهد ما بعد 11 سبتمبر" وأهم الإنجازات وأهم المكتسبات إللي حققها صانع التغيير .. باهي يا خويا إللي يتّقي الله ينصرو ربي ؟ .. يقلك ديراكت اي بطبيعة الحال .. باهي قلي مالا طالبان في شنوة غلطت بالضبط بش خسرت قدّام أمريكا ؟؟ .. اممم يقعد يخمم عاد وقتها وما يطلع حتى خطأ .. وإذا زدت عارضتو يعمل هكة ويصطوي روحو ويقلك اممم انتي متّبع لهواك والحمد لله رب العالمين وماعندي مانزيد 


في الحقيقة هذا هو الواقع وديما السلفية الجهادية وإلا العلمية نحكي معاهم على خاطر هوما يشكلو السواد الأعظم من المتدينين توا وديما رابط معاهم وبالطبيعة انا مانموتش ع جبدان الحديث دونك نهار كامل وانا معاهم .. ثما بطبيعة الحال جماعة منهم تحسهم باهين هكة ويخممو ويحاولو يناقشو وحتى كي تختلف معاهم يحترموك ويفرضو عليك تحترمهم أما ثما جماعة اممم اعععع بفففف
السلفية العلمية تلقاها نهار كامل شادّة تركينة وبعاد ع الناس الكل تعرف علاش ؟؟ على خاطر يقولو إللي كي تحكي مع واحد فاسد المنهج هذاكا يعتبر فتنة ومخالفة ويحرثو التراث الكل بش يطلعو حديث وإلا زوز وإلا كلام للسلف بش يدعمو موقفهم .. وبطبيعة الحال كلنا نعرفو السلف كان كلامهم موجّه لعباد إللي ماعندهمش حجة ويخافو علاهم مش بالتعميم إللي يعملوه هوما خاصة في العصر توا كي الناس الكل تقرا والناس الكل تنجم تبحث ووو .. 
السلفية الجهادية .. هاذم يا سيدي .. الأكثرية بالطبيعة قلتلكم راني نحترم جماعة منهم ع خاطرهم رزان .. هاذم يا سيدي تحكم فاهم أنشودة ع الجهاد ويموتو ياسر يعكسو المجتمع .. المجتمع هكّة اممم لا أنا نعمل هكة ههه برصمي في برشا حاجات ..  نتذكر قبل في عهد المخلوع كانو أولاد حومتي (سلفية جهادية) يطلعو يغنّو في الكار خذو مني فؤادي وامنحوني !! ههه ملا لعب 
وين يتلاقاو الزوز ؟! يتلقاو في حاجتين :
الزوز في بالهم بأرواحهم ملكو الدنيا والآخرة سايي وهوما وحدهم إللي بش يدخلو الجنة وكل إللي خالفهم في النار !! 
والحاجة الثانية هي كي تخالفهم تولّي ديراكت متبع لهواك ويحذروك من غضب الله وماعادش يحبّو يحكيو معاك !!

السفيين محتاجين ياسر بش يطورو فكرهم ويحاولو يلوجو ع حلول عملية للمشاكل إللي نتعرضولها توا ومحتاجين أكثر للعقلاء في الطرفين منهم بش يحاولو يعملو جسور تواصل مع غيرم مش يقعدو هكاكا متعصبين لحاجة برك 

أما الحالات هاذي متاع التقوقع ع الذات وعدم المشاركة في حتى نشاط في المجتمع كان كي يبدا نشاط الناس الكل اللي فيه سلفيين .. أمر عادي جدا في ظل التطرف العلماني وهوما نهار كامل كل ما يشوفو سلفي يفشلوه ويحسسوه إللي هو مانعرفش شنوة .. كائن فضائي ؟!! تي بالله العظيم الخور نشوف فيه ع اليمين وع اليسار وماتعرفش ع شكون تلوم 




mardi 3 mai 2011

أي وصف ينطبق ع النهضة

توا وليت كل مانحط الاكوي متاع بروفيلي نسمع كان ع النهضة النهضة النهضة وبعد تشوف خبر متعدّي هكة واحد يبكي ع ابن لادن تزيد  شوية وتشوف واحد آخر متشمت فيه ويضحك عليه  .. وساعات تلقى خبر هكة يحكي ع النهضة وابن لادن  في نفس الوقت .. حاصيلو تجي بش تفهم كلامهم تدوخ 
الميزة إللي في بروفيلي إللي عندي من أصحابي الأنواع والأشكال المختلفة الكل والحمد لله .. تلقى من مختلف التوجهات والأفكار والبلدان والأديان وانتي ماشي .. الشيعي والملحد والنصراني والتونسي والموزنبيقي واللائكي والنهضوي والجديد إللي مازلت كي تعرفت علاهم هوما من حزب التحرير .. قلت انا عندي حتى  الملحدين خلّي نزيد جماعة من حزب التحرير نشوفهم شنوة يحكيو .. يا بابا يا بابا والله مسكينة النهضة ههههه تي هاو حتى جماعة حزب التحرير عطاوها ع راسها !! مش نرمااااااال برصمي .. هاني طلعت عميل لأمريكا وطلعت نتعامل مع الموساد وديما جماعة النهضة يمشو لسفارة أمريكا وطلعنا نسبّو في الشيخ ابن لادن وناكلو في لحمو ووو !! هاااا هاااا والله راكم كسرتولي راسي والله فديت ! واحد يقولك انتي تسب في ابن لادن والآخر فرحان بموتو وكل واحد آش يصنع في حياتو .. 
بالله فهموني ؟؟ ياخي أي وصف يركب ع النهضة ؟! أي حاجة ؟!!  إللي يخطر على بالك تقول نهضة كذا !! واحد يقلك النهضة متعصبة والآخر يقلك النهضة ميعة والآخر يقلك النهضة اتبع في القاعدة والثاني يقول النهضة اتبع في أمريكا !! تي شنوة هالحالة هاذي !!! بفففف شيء يفدد في بروفيلي كان جا هالبروفيل عبد راني قتلتو ع ما ركبلي العصب 
بجاه ربي اتعلمو حاجة اسمها فقه خلاف بجاه ربي وفرقو بين وضع في أفغانستان تحارب عندها 250 سنة لتالي ونهار كامل ماكلة بعضها انقلابات عسكرية وحروب وحالة وبين وضع آخر مختلف في تونس .. آخر عفسة واحد علماني يقول :

لا أصدّق ما أرى، جماعة النهضة ينعون بن لادن و يصفونه بالشهيد، قاتل الأبرياء الهمجي أصبح بطلا، ثمّ يريدون أن يحكموا تونس.
انا بالنسبة ليا ابن لادن عمل أغلاط كي كان يوصف في تفجيرات الرياض بغزوة بدر وغزوة مانعرفش شنوة وخاصة تداعيات تعامل طالبان مع الحكم في أفغانستان  .. برشا أغلاط عملو مش نورمال ماهاش مقبولة وولاّت الناس كي تقول طالبان تتفجع !! مانيش نحكي ع الجهاد متاعهم صحيح في الجهاد معلميّة وحاربو أكبر قوتين في العالم أما نحكي ع التعامل مع الاستقلالية اللي خذاوها ماعرفوش كيفاش يستحفظو علاها وشدّو في حاجات تافهة وسيبو الاقتصاد والمعاملات الخارجية وغيرها .. تي شنوة إللي مايعملش لحية يحبسوه حتى تطلع لحيتو ! والمرأة فارضين علاها النقاب !! تي ع الاقل كي انتي تتعامل مع عباد يحبّو دينهم يااااااااسر ويتبعو العلماء (الأفغان) ع الاقل احترمو الاختلافات الفقهية وزيد ع الاقل!! وزيد قبل كل هذا طلع اقتصادك بش تبعد الناس ع المخدرات وغيرها هكاكا تجنب الناس الاجرام وتطبيق الحدود علاهم بصفة كبيرة يااااسر .. مش تخليه جيعان وتقلو تسرق نقصلك يدّك !! تي برشا حاجات عملوها بيدونة ياااسر وضرّت باااااارشا بالمسلمين الكل في جميع أنحاء العالم وهذا السبب متاعو أنو جماعة طالبان كانو أول حاجة ماهمش مخالطين العالم الغربي  (مش لازم حكاية العالم الغربي) العربي بش ياخذو من عندهم ع الاقل آخر المدنية إللي عاشو فيها والاجتهادات الفقهية متاع علمائهم وغيرها (مش كيما في طالبان محرمين التلفزة!!) حاصيلو ماهمش عاملين كونتاكت باهي وبرشا انتقادات أخرى خاصة أنو الأمير متاعهم ملاّ ماهوش مولوي يعني ماهوش مكمل قرايتو الشرعية .. تي برشا انتقادات وكيما قلت انتقادات ع تعاملهم السطحي مع الواقع مش في أشخاصهم وإلا في دينهم ياخي كي ننتقدو الصحابة إللي ماسمعوش كلام الرسول (ص) نكونو هكاكا جرحنا فاهم ! بالطبيعة لا !! أما كل واحد عندو الواقع متاعو .. ع سبيل المثال سي وسيم جدي يبحنا كي نسمعو بموت ابن لادن نقومو فرحانين ونشنعوها تزغريط وتصفيق ونعملو حفلة !! برا بابا برا ألعب بعيد انا مانفرحش لموت مسلم قتلوه أكبر أعدائي وحتى لو كان ابن لادن بوذي ماهوش مسلم راني مافرحتش .. واضح ؟! تنتقد فيه على خاطر قتل ؟! تي انتقد بورقيبة الحنين !! 
إللي فهمتو انا توا إللي النهضة بين زوز متشددين .. بين عباد مايحبوش ينتقدو ابن لادن كأنه ملائكة لا يخطئ وبين عباد تقدّس بورقيبة كأنه نبي مرسل (الحقيقة هوما يشوفوه إله) ..  حاصيو العلمانيين موجود علاهم مقال ع خطاب التطرف متاعهم أما ماكنتش نستخايل إللي الاسلاميين بيدهم بش تكون حملتهم مع النهضة هكة !!
من جانب آخر تلقى جماعة أخرين كي شافو الفيديو هذا  متاع الغنوشي يحكي ع ابن لادن !  اكهو عاد 
شدّو في الغنوشي العميل الصهيوني ع خاطر ماهوش موافق ابن لادن في مواقف (تي هي أصلا ماهاش مواقف إنما وضع متاع زوز بلدان مختلفين أصلا) ولاّ الغنوشي منحط وقذر وووو .. هههههه يا جماعة العشرين والثلاثين راهو وقتها انتم تلعبو في البيس والزربوط الغنوشي حاكمين عليه بالاعدام .. يا إللي تسبّو في النهضة كي تترحمو ع ابن لادن وجماعة طالبان تذكرو إللي النهضة زادة عندها مئات الشهدااااااااااااء إللي ماتو ع خاطر لحظة كيما 14 جانفي .. يا جماعة السبّان وإللي ماتعرفوش حاجة اسمها فقه الخلاف بجاه نقصو بلا تحريض .. ربي يقول لا تجعل في قلوبنا غلا للذين آمنوا وهوما أول عباد تلقاهم يسبّو وينكلو بالنهضة .. حاصيلو والله لا عاد تفهم شيء جا بربي ركحت حومتي انا وعملت هدنة مع السلفيين الجهاديين إللي عندنا في بن عروس ماكانش راهم اغتالوني والحمد لله يعرفوني قبل كنت متعصب أكثر منهم ..  الغريبة كي تلقى حتى المتحدث بام حزب التحرير في شمس آف آم ماهوش موافق ع الجهاد في أراضي العرب اسمعوه لهنا  زعمة ينقدوه كيما نقدو راشد ؟؟ 
يالله
تحب تتعرف ؟؟ سب النهضة 
راااااااااااااسي


dimanche 1 mai 2011

عسلامة

بسم الله،

باختصار شديد هذه مدونة العبد لله زياد هاش آف بارك الله فيه ونفع به الأمة. اللهم آمين.
زياد هاش آف هو شاب تونسي قاطن في ضواحي العاصمة له من العمر عقدين وبعض السنوات إسلامي الفكر عربي الهوية قدسي الهوى.

هذه مدونة أنشر فيها بعض المقالات الشخصية وبعض الآراء التافهة وبعض التأملات السطحية وقد ترقى في بعض الأحيان إلى التأملات العميقة. قد تكون نافعة تارة وتكون ضارة أحيانا.

أكتب في بعض الأحيان باللهجة العامية التونسية وباللغة العربية الفصحى، لا أريد أن أكتب باللغات الأجنبية حتى لا ينتحر أهلها كمدا وحسرة ثم ينتحروا من أعلى قمة جبلية عندهم.


هي مدونة شخصية أكتب فيها تفاعلي مع الأحداث وتفاعل الأحداث فيّ.

أرحب بجميع تفاعلاتكم وتعليقاتكم، نقدكم وتوجيهاتكم، فهدفي من المدونة التعلم من خلال تصويب أفكاري لا التعليم.

الرجاء عدم استعمال أي مواد محظورة والعمل على تحقيق السلم العام في المدونة.