وينهم جماعة النهضة في الاعتصام ؟!

كيما يعرفو الناس الكل البارح حركة النهضة عملت اجتماع شعبي كبير ياسر في القبة وجاو آلاف العباد من مختلف أنحاء الجمهورية (ملتقى وطني) وعبّاو القبة من أولها لآخرها وقعدو الناس واقفين في وسط القبة ومارفعتهش البلاصة وخرجو البرا يتفرجو في التلفزة .. برشا عباد من أنصار الحركة فرحو بالعدد الكبير هذا ع خاطر يبرز مدى شعبيتها عند العباد  .. وعباد أخرين قالو وينهم العباد هاذم الكل في الاعتصام ؟! يعرفو يصيحو كان في القاعات المغطات ؟! وينهم وقتلي نسحقوهم في المطالب السياسية ؟! برشا أسئلة تطرح في الموضوع هذا ولازم نعرفو إللي ثما زوز آراء متباينة تماما .. عباد تقول حركة النهضة هي إللي نظمت اعتصام القصبة نهار الجمعة وقالو العدد هذاكا إللي جا نهارتها هوما أنصار الحركة اكهو .. وهاذم يغطيو في عين الشمس بالغربال ع خاطر كان قارنو بالتظاهرات الثقافية راهم ماقالوش التخلويض متاعهم وزادو تصدمو كي شافو القبة تعبات من أولها لآخرها .. وصنف آخر قالو النهضة غائبة تماما ع الاعتصام وماحضرتش علاش ع خاطر مادعاتش للاعتصام والصنف هذا في بالهم إللي الحركة كي ما دعاتش يعني أنصارها ما يهبطوش وكأنهم أنصارها ربوات مايتحركو كان بالخيوط من الحركة .. انا نحب نذكر أنصار حركة النهضة إللي هوما قبل ما يكونو أنصار الحركة هوما توانسة قبل كل شيء ولازم مصلحة البلاد فوق كل شيء وإذا كانت الحركة مادعاتش للاعتصام من واجبهم أنهم يهبطو ويتظاهرو ويرفضو سياسات القمع ويطالبو بحقهم في التظاهر والاعتصام .. ولازم زادة يكونو هوما السباقين للأمور هاذي على خاطر الساكت ع الحق شيطان أخرس .. وفي نفس الوقت نذكر العباد اللي يقولو حركة النهضة هي إللي نظمت الاعتصام وواقفين ضد الاصعتصام نذكرهم بش يخرجو شوية من المعارك الايديولوجية التافهة ومن سياسة "عدو عدوي صديقي" إللي عاملينها مع الحكومة ضد النهضة حاليا .. سيب عليكم من الأمور هاذي وطالبو بمحاسبة رموز الفساد ومحاسبة التجمعيين قبل المصالحة معاهم ومحاسبة القناصة وغيرهم من المطالب الشعبية ! الشبعية وماهاش حزبية !! ومن ناحية أخرى إذا أرادو جماعة النهضة أنهم يعملو اعتصام فهذاكا من حقهم وماثما حتى واحد ينجم يحرمهم من حقهم إذا كان سلمي ومن الافضل تنقصو شوية من العقلية النوفمبرية .. بالنسبة للناس إللي يقولو النهضة وجماعتها ماخرجوش في الاعتصام فأنا واحد من الناس إللي شفتهم نهار الجمعة في القصبة أكثريتهم من النهضة (نحكي ع إللي نعرفهم) ومن ناحية أخرى لازم نتذكرو حاجتين : الاولى أنو الاعتصام تفرق قبل ما يجيو الناس من الجوامع الكل وبداو يضربو من قبل ما توفى الجمعة بمعنى أننا مانجموش نحسبو قداش من واحد كان يحب يشارك في الاعتصام هذاكا .. والحاجة الثانية هي أنو الاعتصام نذكر ونقول هو اعتصام شعبي ماهوش حزبي بمعنى كي تلوم لوم ع الناس الكل وهاو شنو تقول :

وينهم الجماعة إللي ماشين للستادات ومعبين الستادات نهار وليل ؟! وينهم الجماعة إللي مشاو لزغلول النجار وعباو القصبة من أولها لآخرها ؟!!! وينهم العباد إللي مشاو لخطيب الادريسي وينهم هاذم إللي يحكيو نهار كامل ع الجهاد وووو ؟!!! وينهم الجماعة إللي معبية البحر نهار كامل ؟؟؟ ووينهم الجماعة إللي عباو القبة نهار البارح ؟!! .. هكة نفهمك وتلوم ع الأطراف الكل إللي ماحضرتش بكثافة في جامع القصبة من كل الأطراف سواء النهضة وإلا غيرها .. وراو أي اعتصام إذا خذا صبغة ايديولوجية فهو اعتصام فاشل قبل ما يبدا ع خاطر فيه اقصاء من الأول وزيد اعتصام كيما متاع القصبة ماهوش حزبي لأن المطالب شعبية قبل كل شيء.

وبجاه ربي تذكر .. قبل ماتكون إسلامي وإلا علماني وإلا غيرو .. راك تووووونسي ولازم تخدم مصالح بلادك والحق أولى بالاتباع سواء طالبت بيه النهضة أو غيرها من الأحزاب وماكش سجين حزبك وكل حزب ينجم يخطئ ويصيب والواجب أنك تصلح المسار متاعو وهكة تكون عنصر فاعل مش مجرد .. دمية !!
ع كل حال هاذي وجهة النظر متاعي ...