مسلسل حقوق المرأة²

كلنا نتذكرو النساء الديمقراطيات كي خرجو لشارع للحبيب بورقيبة قبل ما يرجع حزب النهضة كوم كوا هانا موجودين ويعيطو "حقوق المرأة" و"لاسترجاع حقوق المرأة التونسية" وشوية آخر ويقولو يا نساء العالم اتحدو .. انا مانيش فاهم علاش خرجو وبشنوة يطالبو بالتحديد ؟! والله ولّيت باهت في هالرجالفوبيا هاذي ونخمم بش نعمل جمعية "استرجاع حقوق الرجل" وليناش مضطهدين نحنا ؟!!  إللي يحب يزايد يعمل مقال وإلا زوز ع حقوق المرأة والحكايات هاذيكا !! غريبة والله مش نورمال !! تحل جريدة تلقى صفحة المرأة تحل التلفزة تلقى مشاكل المرأة تحل الراديو تلقاهم يحكيو ع حقوق المرأة !! تي فك عليا ملا موضوع فددونا بيه !!

المرة إللي فاتت نسمع في الأستاذة بشرى بالحاج حميدة تحكي في برنامج ع حقوق المرأة ياخي ادخلو جماعة وقالو "المرأة مرأة والراجل راجل وكل واحد في بلاصتو مانحاولوش نخلطو" ياخي هي تغششت من الكلام هذاكا وقالت "لاحظت إللي المجتمع لازمتو برشا خدمة بش يغزر للمرأة والرجل على أساس التساوي" وقالت "لازمني نحشد برشا نساء في جمعيات بش نوعاهم والموضوع هذا نطرحوه ع طاولة النقاش" في معنى كلامها (ياخي ناقص انا بش يفددوني بالموضوع هذا ؟!) .. الحقيقة هي موقفها صحيح وأكيد الشعب التونسي يعرف هذا مليح لكن من ناخذو الموضوع من ناحية أخرى .. نصف قرن كل مانطرحو الموضوع هذا لازم يطلعولنا جماعة يبداو يسبولنا في ديننا ويحتقرو فيه ويمتهنو فيه ويسبو في الحجاب والحياء إللي يحث عليه الدين وغيرو بالطبيعة بش يكونو الناس متربصين كل مايتطرح الموضوع هذا يتذكرو دينهم ويحبو يدافعو عليه وأكيد زادة التوانسة الكل وإلا أغلبهم فدّو من الموضوع هذا وحتى مادام بشرى لاحظت إللي هي قالت "تقريب كسرتلكم روسكم بالموضوع هذا" وماحبتش تحكي فيه برشا .. بجاه ربي فهموني .. نصف قرن ونحنا عندنا كان الموضوع هذا يتطرح .. من آلاف المواضيع نطرحو كان الموضوع هذا دون غيرو :

ناس تحرق في ارواحها .. وهوما يقولو المرأة المرأة المرأة

ناس أموات على شواطئ لامبادوزا .. وهوما يقولو المرأة المرأة المرأة

عباد ماهاش لاقيا خبزة .. وهوما يقولو المرأة المرأة المرأة

عباد سايي ماعادش تنجم تعيش وعندها امراض ومشاكل قد شعر الراس .. وهوما يقولو المرأة المرأة المرأة

تي فك سيب صالح !!!!!!!!!! عملنا ثورة وللأسف باقي يعاودولنا نفس المعبوكة .. وهوما يقولو المرأة المرأة المرأة

بفففففف مش شيء يفدد هذا ؟!!! 

المشكلة مبعد يدورو ع الشباب إللي قاعد في القهاوي يقومو  يسبو فيه نهار كامل في التلافز ويقففو للمرأة .. الشباب إللي قاعدة في القهاوي وهي بشهايدها  وبديبلوماتها  ونهار كامل يلعنو فيهم قال شنوة مجموعة من البخالاء ووو وكي تجي تشوف تلقاهم نهار كامل وهوما يلوجو ع خدمة وراسهم تنقب من الشمس وكي يمشي للشركة والا المعمل وإلا غيرو يقبلو المرأة ويطردو الشباب وبعد كي يروحو للدار يلقاوه يحكيو ع الهم متاعو إللي عايش فيه ؟! لا .. يلقاهم ويناقشو في مشاكل المرأة المسكينة ! وبالطبيعة كل مرة يعرجولو بسبة وإلا اثنين !! تي ماو بالطبيعة الشاب هذا إما بش يشد الحبس ويولي مدمن ع الجرائم وإلا يحرق لإيطاليا وإلا يحرق روحو .. ماتفيقو كان كي يعاودو الشباب يعملو ثورة أخرى ؟!!! بفففف

حاجة أخرى يتكلمو علاها المدافعون ع حقوق المراة .. يجيبلك حاجة في القانون ويقلك هاو القانون متاعنا يحقر في المرأة وماعطاهاش حقها .. يا عباد كان هذا صاير وموجود في القانون متاعنا كيما كي يسافر الراجل مرتو تستحقو بش تطلع بعض الاوراق .. كي تلقاو حاجة هكة راهي ثغرة في القانون لازمها تتصلح وماهاش مبنية ع احتقار للمرأة وإلا إهانة وماكثرها ثغرات القانون التونسي مش كان للمرأة اكهو ! علاش كي تجيو ع قانون خاص بالمرأة تحطو قدامو ديراكت احتقار وامتهان وعدم مساوات ورجعية وتعصب وفي آخر الأمر وفي كثير من الأحيان دين الاسلام  ؟!!!

مانيش ضد المرأة كيما بش يأول البعض ومانيش ضد طرح المواضيع هاذي أما انا نحب أننا نطرحو مواضيع الساعة إللي قمت علاها الثورة وكي نحطو برنامج يكون إسمو مشاكل التوانسة مش مشاكل المرأة وكي نطرحو الحقوق نتكلمو ع حقوق الشعب مش المرأة اكهو لازمنا في الوقت الحالي شوية موضوعية ونطرحو المواضيع إللي قامت علاها الثورة على خاطر هرمنا من هذه المواضيع إللي نفد كي نسمعها ومكررة ومعاودة يااااااسر ولاّت تقسيـــــــــــــم للمجتمع فوق  من اللازم ورسخت عقلية الصراع بين المرأة والراجل مش التكامل .. والسلام