خطبة جمعة .. إمــــام علمانــــي

علاش ماثماش إمام جمعة علماني ؟

السؤال هذا قعدت نخمم فيه وحيرني برجولية .. علاش ماتلقاش إمام جمعة علماني يقوم كل جمعة يلبس كارافات وسروال دجين ويقعد على بيرو وقدامو بيسي في الجامع (وينحّي المنبر) ويعمل خطب للناس ويقلهم الدين الإسلامي هو باختصار شديد أنك تستكفى بروحك .. ما يهمكمش في العباد شنو عملت وشنو ما عملتش .. لا أمر بالمعروف لا والو ماثماش منها الحكايات هاذي وكتاب القرآن خليه عندك في دارك مش تخرجو البرا معاك .. ويزيد ينقللهم على المفتي الشيخ الطالبي قولو أنو الصحابة مجموعة من الطغاة اللي تقاتلو وكانو يلوجو كان ع ربحهم هوما اكهو (هذاكا علاش سيدنا عمر مثلا جاه واحد روماني يلقاه راقد في جبانة ! وحديث نحفظوه الكل أسلمت فعدلت فأمنت فنمت) ويقلهم ما ثماش حاجة اسمها شريعة إسلامية وكلمة شريعة ماوردتش في القرآن (آآ بون !!!! حل سورة الجاثية سيدي خويا) وبعد يزيد يهبط علاهم بداودي ويقلهم ياخي هوما المسلمين حضارتهم كاملة مبنية ع العلمانية ودمج الدين مع السلطة ماثماش منها بكّل (بش يضفي ع العلمانية صبغة تراثية .. سرقة التراث كيما قال عبد الإله بلقزيز) ويزيد شوية آخر ويزيد يذكرهم إللي الحضارة الإسلامية قامت على الظلم والسرقة والقتل .. ياخي المسلمين عرفو حضارة من أصلا (هذا إذا حب يقارن الحضارة الاسلامية بمحاكم التفتيش إللي في أوروبا .. شوية تناقض مع قولو السابق مايهمش المهم يضرب عصفورين بحجرة منها يقولهم راهو العلمانية عندنا هي الأساس ومنها يقلهم الإسلام والنصرانية حاجة وحدة) شنو إحساسك كي يطلعلك في نهار فضيل في بلاصة فضيلة في وقت فضيل يطلعلك إمام كيما هكة ؟! 

هذاكا الميتون الاول (ماعادش يقول الخطبة الاولى) وتوا نتعداو للخطبة الثانية .. توا الإمام التنويري بش يعطيكم شوية فقه .. أول ما يبدا يقلكم شوفو .. الحجاب هاذي حاجة ما ثماش منها وهي مجرد عادة اكهو كانو يعملو فيها قبل هكاكا ع الجو .. هي عادة في الجزيرة العربية اكهو ماهاش تابعتنا نحنا .. ياخي نحنا شنوة ؟ نحنا بربر والعرب أقلية .. هي مجرد عادة انتقلت من الجزيرة العربية للفيلبين من الشرق إلى المغرب منهنا وصولا إلي الأندلس ونيجيريا وجزر قمر .. هي عادة انتقلت في ما كان يسمى عدوى العادات فهمتها كيفاه ؟! .. ويزيد ينقللكم من كتاب حيرة مسلمة فصل كامل الملخص متاعو أن الزنا حلال والسحاق حلال واللواط حلال .. هوما في الأصل كلهم عادات انتقلت لهنا في ما كان يسمى في موسم عدوى العادات إللي حكيت بيه بكري مش الإسلام جابو .. هذا هو التجديد الفكري كرمك الله وهذا هو تجديد الإسلام ولازمكم تتعلمو الإسلام الجديد بتفكير عصري عقلاني .. ما ثماش عبادات في الاسلام وماثماش حاجات صعيبة إذا كانجمتش تعمل فريضة تلف وبالنسبة للحرام كل شيء عادي راهو الدين دين يسر محلاه ديننا دين الاسلام .. إسلام شنو ؟!! ديننا دين الحب كيما قال الشيخ الطالبي

في آخر الخطبة الإمام بش يعطي أصول الفقه ويقللكم الإسلام باختصار هو :

 أنك تتبع تقاليد بلادك  

وإذا لقيت حاجة في القرآن ماعجبتكش ردها عادات متاع الجزيرة العربية 

إذا ما نجمتش حاجة في العبادات قول الاسلام دين يسر وتلّفها  

إذا مانفعوش هاذم الثلاثة قول ديني دين الحرية  

من غير مانوصيكم : ما ثماش حاجة اسمها أحاديث (نقبلو أحاديث سقراط وأفلاطون أما أحاديث النبي ماثماش منها الحكاية - وماثماش حاجة اسمها علم الحديث)

أي وحد يخالفك قلو يا ظلامي يا إرهابي

 أخيرا خطبة الجمعة ماهاش فرض ومافهمتش علاش جيتوني يا متعصبين

قومو إلى صلاتكم peace and love

يا علمانيـــــــــــــين ياللي اغتصبولكم حقكم في إمامة الجمعة .. يا علمانيـــــــــــين ياللي قهروكم وطردوكم من الجوامع .. يا علمانييــــــــــــــن ياللي ساكتين ع حقكم من عهد بورقيبة .. يا علمانيـــــــــــــين خطبة الجمعة تناديكم اليوم الحرية اليوم الحرية اليوم تقراوولنا كل جمعة طلعاتكم الغريبة العجيبة .. والعاقبة لكتاب حيرة مسلم خلي نشوفوه آش بش يهتري علينا