ثورجية في دقيقة

بعد ظهور ما يعرف بالمفتاح في دقيقة ظهرت حاجة جديدة وهي الثورجية في دقيقة .. عندنا برشا ثورجيين في تونس طاحلهم الشارج متاع الثورجية ولاو مستحقين يعملو ضربات ثورة كل مرة .. وبطبيعة الحال ما تحلى الثورة كان ع حركة النهضة .. الحركة الصهيوأمريكوموزنبيقية .. نلقاو عباد يثورو ع النهضة علاش ؟ ع خاطرها حاولت تطفئ مخاوف اليهود التوانسة وتطمئن جميع الأطراف سواء الداخل وإلا الخارج سواء العرب وإلا الغرب سواء علمانيين وإلا إسلاميين باختصار العباد الكل .. ثما عباد استغربو .. قالو كيفاش النهضة ترضاهم ؟؟ وقالو هاو النهضة عندها أكثر من أربعة أيام "شادة الحكم" شنو عملت ؟؟ وشوية آخر يخرجو باستنتاج أن الحركة عميلة ومنافقة وماهاش تخدم ع روحها .. هاذي مصائب الثورجية في دقيقة .. شنو المطلوب بابا من الحركة بالضبط ؟؟ أول ما يسمعو القياديين إللي النهضة ربحت يهبطو لجربة يشدو اليهود غادي يفشخوهم ؟ وإلا يمشو ديراكت يلوجو ع حكومة الظل ويشدوها يصلبوها ع المنقالة متاع تونس ؟ وإلا كي يشوفو واحد من المتورطين في الفساد يخلطو عليه يشلبقوه ؟؟ وإلا يهربو يتخباو وراء أقرب شجرة بش ما ياخذولهمش معاه تصويرة ؟؟ وبالنسبة للعلمانيين شنو تحبوهم يقولو ؟؟ هانا ربحنا ووالله لا عاد تشوفوها الحكومة وماعادش تحلمو بالديمقراطية ؟؟؟ وإلا يقومو للغرب ويتهددو عليه ويقولولو هانا شدينا الحكم واتو نزدمو عليكم ونسترجعو صقلية والأندلس ؟؟ شنو هالحاااالة في البلاد ؟؟؟؟ والله واحد لا عاد فاهم شيء .. الناس الكل لامت ع الحركة كيفاش ماخرجتش بيان ع يسري الطرقي وقالو شباها لتوة وبطات وأول ما خرجت البيان في عوض يقولو صحة قالو سداف .. ولات الحكاية متاع نفاق ومش من قلوبهم ومانعرفش شنوة ؟ يعني كان ماخرجتش يأولو الحكاية وكان خرجت يقولو يكذبو ؟ باش يخممو هاذم بجاه ربي والله ساعات نقعد باهت .. عموما نعرفو إللي الغاية هي إرضاء الله مش إرضاء الثورجيين ولكن يا عباد شوية عقلانية يهديكم راهي سياسية مش طرح نوفي .. الحكومة مازالت ما تشكلتش وهوما يطالبو بتطهير وزارة الداخلية حاصيلو تجي تفهم تدوخ تي وزارة الداخلية وحدها ماخور في وسطها بش تنظاف لازمها مشروع، شباهم فاهمين النظافة ع انها باكو اومو ونظفها من الأول للخر وإلا شنو الحكاية ؟؟ ونفس الشيء بالنسبة للسفارة الجزائرية إللي بعثت مجموعة من الدعوات لكذا شخصية وبطبيعة الحال لازمها تبعث لحمادي الجبالي بما أنو رئيس الحكومة القادم وظهرلها بش تبعث لفلان وفلان التجمعي، باش مطالب حمادي الجبالي ؟ أول مايجيه الاستدعاء يطلبهم يقلهم لشكون عيطتو من رموز النظام السابق ؟؟؟ ياولدي راهو حركة سياسية ماهاش مصباح سحري، وكل الأحزاب إللي في حكومة الوحدة الوطنية توا مطالبين أنهم يكونو فاعلين ويتحملو كامل مسؤوليتهم مش ضربة ضربتين يقوم واحد منهم يبيع في الكلام ويقول "لو يصير كذا أنا ننسحب"، "لو تدخل البلاد في حيط انا اندد"، "لو يشد بوش رئيس حكومة أنا نولي في المعارضة" بطبيعة الحال هذا كل رميان كلام، يقول القائل علاش ؟ هوما يعرفو إللي حركة النهضة قبل كل شيء ماهاش بش ترضى بالامور إللي هوما يفترضو فيها نهار كامل وهوما متأكدين 1000 بالـ100 من هذا بش بعد كي الحركة تمشي ع نفس إللي قالوه يقولو للتوانسة "كان ماجيناش أحنا هددنا الحركة راهي عملت الحاجات إللي توقعناها" ووو، يبيعو في الكلام للتوانسة ويسوقو في تصريحات للاستهلاك الإعلامي وثورجيي الفايسبوك يتبعو كل كلمة تتقال من غير لا يخدمو مخاخهم، هذا الكل بش تطلع الأسهم متاعهم أكثر عند الشعب .. لكن إللي متاكد منو أنو الحركة إللي اختارها الشعب بالاغلبية بش تعبر ع تطلعاتو وتحقق مطالبو الثورية وتنظف البلاد من المواخير إللي فيها والمسألة وما فيها مسألة وقت لا أكثر وثما مواقف مايسمعوهاش العباد لكنها مطروحة في داخل الحركة وتدرس كافة الاختيار بتفاني كبير وعباد فيها ماترقدش بالليل ع الحكايات هاذي وتبات تخدم لصالح البلاد، هاذم نفس العباد إللي تعذبو من الفساد هوما توا تاعبين بش يصلحوه والواجب توا شوية ثقة فيهم وشوية تريث والإصلاح يجي بشوية بشوية من تصليح القضاء قبل كل شيء إلى محاسبة رموز الفساد إلى تحقيق كافة بقية المطالب، ومالازمناش ننساو إللي الحركة الإسلامية في تونس هازة ع عاتقها حمل كبير ياسر يتمثل في المشروع الإسلامي إللي لازمو ينجح ولو كرخ من كرخ بش يعرف كل معارض للتيار الإسلامي كوعو من بوعو والحركة عارفة قدر المسؤولية هاذي ومدركة تماما إللي هي ممثلة للتيار الإسلامي في المنطقة وإللي بش تعمل تجربة في تونس بش يدرسوها الشعوب الإسلامية الاخرى يعني إذا نجحت تمهد بذلك الطريق لتيارات إسلامية أخرى في بلدان اخرى، الحركة تدرك تماما ان المشروع ماهوش قطري فقط (قطري بضم القاف مش بالفتحة، بش مايمشوش القطروفوبيين لبعيد) ومن جانب ىخر لازمنا نعرفو إللي ثما برشا قوى "حداثية" تحب تدخل البلاد في حيط بأي شكل من الأشكال خاصة في الفترة هاذي اللي بش تمتد لمدة عام بش يلقاو بشنوة يروجو لاحزابهم الفاشلة في الحملة القادمة ويقولو هاو النهضة شنو عملت للبلاد وهي ماهاش قادرة بش تخدم وهاو إضرابات وإحتجاجات وكالعادة يشوهو الحركة بش يربحو أصوات العباد وإحتجاجات سيدي بوزيد فيها والإضرابات الأخيرة إللي شهدتها البلاد دليل ع هذا، والشيء مزال، العباد إللي انقلبو ع جبهة الانقاذ في الجزائر باستخدام الجيش وتواطؤو مع فرنسا ودخلو بلادهم في عشرية دموية ينجمو يعملو أي أسلوب آخر ويستغلو الاعتصامات والمظاهرات لنفس الغرض، لإقصاء الإسلاميين، مش نظرية مؤامرة لكن الحجج إللي نشوف فيها ع الفايسبوك لتوتير العباد والقضايا اللي صارت منذ الانتخابات لتوة وإللي كانت متسارعة وعديدة في ظرف جمعة لازمنا نكونو منها حذرين واستغلال هذا الكل في تخوين حركة النهضة (إللي مزالت ماعملتش حكومة وإللي أكدت وعاودت انو البلاد مسؤولية جميع القوى مش كان النهضة برك، هوما يحبو يرمولها الكورة) حكاية علاها أكثر من نقطة استفهام كذلك بالنسبة لاحد زعماء القطب إللي اتهم الحركة بعديد الاتهامات الصبيانية في قناة الآن في محاولة يائسة منهم وما أبهم منو كان هاك الكائنة الفاضائية إللي مشاتلهم في فرنسا وتتشحت فيهم بجاه ربي عاونونا راهم ربحونا وهذا دليل على مدى ***** العباد إللي كيفها واستعدادهم للتحالف مع فرنسا ضد النهضة. بطبيعة الحال ثما شكون بش يعتبرو هذا هزان قفة وفارينة وإلى ذلك من التأويلات (كالعادة) نقلهم العباد إللي ماهزتش القفة لابن علي ماتهز القفة لحتى واحد آخر وكان جاء عيننا ع القفة رانا وقت ابن علي شخنا وإلا رانا توا في حزب اللاوطني الخر ع الأقل غادي تمشي تاخو فلوس وتروح عامل جوو وإلا رانا مع جماعة البي دي بي إللي يفرقو في المنشورات متاعو بالفلوس وكاري شباب لهذا، مش ندخلو مع النهضة نخدمو ونتعبو ونزيدو نمولو مقراتنا وتلقانا في لخر فرحانين بخدمتنا، حاصيلو برشا عباد من احزاب أخرى ماهاش بش تفهم ع خاطر مش مستنانسين، هذا ثقة في الحزب إللي انتخبناه وماناش مطالبين أننا ننتخبو حزب وبعد نهارين تلقانا درنا نسبو فيه ع أسباب تافهة قال شنوة ماناش نهزو في القفة (نفس العباد هاذم وقفو ضدنا كي خرجنا لاعتصام القصبة ثلاثة وجايين توا بعد الانتخابات بنهارات وبعد ماخسرو يحبو يثورو) لهذا الثورجية البيدونة ماناش مستحقينها توا إنما نخلوها للوقت المطلوب والصحيح وإللي يكون لا غبار عليه مش أي خبر يخرج ع الفايسبوك نتلفت نلقى العباد الكل تندب فيهم وتبكي وتنوح. السياسة هي فن الممكن مش ثورجية ببهامة.